2025eko Kirolgalak Gipuzkoako kirolaren ospakizun handi bihurtu du Tabakalera
Ostirala, 2025.eko Azaroak 14
-
Gipuzkoako Foru Aldundiko Kultura eta Kirol Departamentuak Gipuzkoako kirolaren urte historikoa markatu duten lorpenak, ibilbideak eta balioak aitortu ditu.
-
Alex Txikon, Nadia Erostarbe eta Esther Arrojeriak eta Alba Menéndezek osatutako Bera Berako bikotea, gaueko protagonista nagusiak.
2025eko Kirolgalak 400 pertsona baino gehiago bildu ditu gaur arratsaldean Tabakaleran, emozioz, harrotasunez eta aintzatespenez betetako hitzordu batean. Gala Gipuzkoako Foru Aldundiko Kultura eta Kirol Departamentuak antolatu du, eta azken urtean lehiaketan eta lehiaketatik kanpo egindako ahaleginagatik, konpromisoagatik eta balioengatik nabarmendu diren kirolari, klub, federazio eta erakundeak omendu ditu.
Goizane Alvarez Kultura eta Kirol diputatua buru izan duen ekitaldian, aurkezle lanetan aritu dira Maite Esnaola eta Roberto Ruiz de Azua, Verdini Dantza Taldeak emanaldi bat eskaini du eta ikus-entzunezko formatu berritzaile baten bidez kirol denboraldiaren errepasoa egin da protagonisten eskutik.
Bere hitzaldian, Goizane Álvarezek azpimarratu duenez, " gaur kirola ospatzen dugu, baina batez ere garena ospatzen dugu, lurralde bat, Gipuzkoa, egunero entrenatzen duena: konpromisoan, berdintasunean eta zaintzan. Kirolak erakusten digu inork ez duela bakarrik irabazten, eta arrakastak partekatua denean bakarrik duela zentzua. Hemen gorputz guztiek dute garrantzia, eta pertsona guztiek dute benetako aukera hazteko eta beren bizitza duintzeko. Hori da defendatzen dugun eta elkarrekin entrenatzen dugun demokrazia, kantxen barruan eta kanpoan. Demokrazia bat duintzen dituen bizitzak bezain indartsua delako. Aurtengo saridunak Gipuzkoako onenaren isla zarete: talentua, ahalegina eta apaltasuna. Zuen garaipenek gu irudikatzen gaituzte, baina baita zuek altxatzeko, ikasteko eta taldea osatzeko duzuen modua ere. "
2025eko Kirolgalako sarituak
"Kirol Konpromisoa" saria Ramón Cid entrenatzailearentzat izan da, Gipuzkoako atletismoaren garapenean erreferente eta funtsezko figura dena.
"Kirol Enpresa" saria Eulen Taldeak jaso du, Gipuzkoako txirrindularitzari emandako babesagatik eta kirolaren balioen aldeko apustuagatik.
"Gipuzkoarren Kirola" saria herri-bozketaren bidez aukeratzen da, eta Tximist Fundazioarentzat izan da sariduna, Aitzane Encinas, fundazioko presidentak jaso du.
"Gipuzkoa Kirolak Gizonezkoa eta Emakumezkoa 2025" sariak Alex Txikon mendizalearentzat eta Nadia Erostarbe surflariarentzat izan dira, mugak gainditzearen eta talentuaren erreferenteak, mundu osoan zehar Gipuzkoaren izena eraman dutenak.
Distira sariak, gaueko sinbolikoenak, Esther Arrojeria eta Alba Menéndez Super Amara Bera Berako eta Gipuzkoako emakumezkoen kirolaren ikonoen ibilbide bateratua aitortu du. Biek txalo zaparrada jaso dute saria jasotzean, Gipuzkoako emakumeen kirolaren ikusgarritasuna eta kontakizuna eraldatzen lagundu duen ibilbideagatik.
Aintzatespen kolektiboak eta kirol-aintzatespenak
Ekitaldian zehar, urteurrenak ospatzen dituzten klubei eta erakundeei omenaldia egin zaie: Oiartzun Kirol Elkartea, Asociación de Veteranos de Euskadi–OPLA, Zumaiako Telmo Deun Arraun Kirol Elkartea, Club Vasco de Camping, Itsastarrak Mendi Taldea eta Gipuzkoako Euskal Pilota Federazioa.
Kirol Merezimenduen blokean, Super Amara Bera Bera, Donostia Arraun Lagunak, Orio Arraunketa Elkartea, Txuri-Urdin emakumezkoak, Jokin Altuna eta Beñat Rezusta saritu dituzte, denboraldian zehar lortutako emaitza bikainengatik.
Era berean, Europako eta munduko txapelketetan podiumera igo diren kirolariak nabarmendu dira, besteak beste, Maialen Chourraut, Pau Echaniz, Irati Idiakez, Iñigo Llopis, Nahia Zudaire, Beñat Fernández eta Gipuzkoako talentuak mugarik ez duela erakusten jarraitzen duen belaunaldi berri bat.
Gipuzkoako kirolaren oraina eta etorkizuna ospatzeko gala
Gidoi berritu batekin, ikus-entzunezko eszenaratze batekin eta zeharkako begirada batekin, 2025eko Kirolgalak omenaldia egin nahi izan die Gipuzkoaren inspirazio iturri diren balioei: ahalegina, inklusioa, berdintasuna eta komunitatea.
Gauari amaiera emateko, Verdini Dantza Taldeak bere emanaldia eskaini du eta familia argazki bat egin da oholtzan saridun guztiekin.