Gipuzkoa, All Stars proiektuaren nazioarteko egoitza: Kirol Departamentuak sustatutako kirol eredua Europan ezagutarazi eta zabaltzeko abiapuntu.
Asteazkena, 2024.eko Abenduak 11
-
Zazpi herrialdetako ordezkariek osatutako lantalde bat gure lurraldean izango da astelehenetik asteazkenera bitartean, Hegalak Fundazioaren proiektua, Eskola Kirolaren programa eta biztanleria ez-aktiboari zuzendutako Kirol Orientazioko Zerbitzuen sarea bertatik bertara ezagutzeko.
-
Kiroletako diputatu Goizane Álvarezek azpimarratu duenez, "Gipuzkoa Europako proiektu honen egoitza izateko aukeratu izana, eta gure politikak eta programak Europa mailan aztertzeko onartu eta hautatu izana harro egoteko modukoa dela uste dugu, bide onetik goazela adierazten duelako".
Proiektu honen xedea da tokiko kirol politika arrakastatsuak identifikatzea eta aztertzea, baztertutako jendea kirol jarduerara erakarri eta kirola egiten has dadin sustatzeko. Bereziki, kirol jardueretatik kanpo gelditu ohi diren taldeen integrazioa sustatu nahi du, hala nola etorkinena, desgaitasuna duten pertsonena edo adinekoena.
Kiroletako diputatu Goizane Álvarezek azpimarratu duenez, "Gipuzkoa Europako proiektu honen egoitza izateko aukeratu izana, eta gure politikak eta programak Europa mailan aztertzeko onartu eta hautatu izana harro egoteko modukoa dela uste dugu, bide onetik goazela adierazten duelako". Jardunaldi honen bidez espero dugu elkarrengandik ikastea, tresna berriak garatzea, ezagutzak partekatzea eta, garrantzitsuena, kirola denontzako jarduera bihurtuko duten benetako aldaketak ezartzea, inor bazterrean utzi gabe".
Ikuspegi berritzailea kirol integrazioan
Europako lantaldean Alemania, Herbehereak, Polonia, Suedia, Norvegia eta Espainiako erakundeetako ordezkariek parte hartzen dute eta Gipuzkoara egingo duten bisitan gure lurraldeko tokiko kirol politika berritzaileenetako batzuk ezagutuko dituzte. Horien artean, honako hauek nabarmentzen dira: Hegalak Zentroaren esperientzia, desgaitasuna duten pertsonen inklusioa sustatzen duen programa aitzindaria, desgaitasunik gabeko pertsonen parte-hartze aktiboaren bidez; Gipuzkoako Eskola Kirolaren programa, haur guztiek txikitatik kirola egiteko aukera izatea sustatzen duen kirol hastapeneko eredu inklusiboa; eta Kirol Orientazioko Zerbitzuen sarea, biztanleria ez-aktiboari zuzendua, herritar sedentarioenek beren eguneroko bizitzan jarduera fisikoa egin dezaten motibatzera bideratutako programa baten bidez.
Hiru programa horiek adibide nabarmen gisa aukeratu dira proiektuaren amaierako txostenean sartzeko; ondoren, Europa mailan zabalduko da.
Gipuzkoako lantaldea Gipuzkoako Foru Aldundiko Kirol Zuzendaritzak eta Euskal Herriko Unibertsitateko GIKAFIT ikerketa taldeak osatzen dute, eta funtsezko zeregina betetzen du Europa mailan erreferentzia izan daitezkeen tokiko kirol politikak identifikatu eta aztertzeko orduan. Bere eginkizuna da talde baztertuak kirolean integratzeko jardunbide onenak dokumentatzea eta Europa osoan politika inklusiboak eta bidezkoak sustatuko dituen ezagutza sare bat sortzen laguntzea.
AllStars proiektuak bi urteko iraupena du, eta helburu nagusia da gaur egun kirol gutxi egiten duten edo kiroletik erabat baztertuta dauden gizarteko talde batzuk kirolera erakartzea. Parte hartzen duten erakundeen arteko lankidetzari esker, tresnak eta jardunbide egokiak garatu ahal izango dira, gero, Europako beste hiri eta eskualde batzuekin partekatzeko.
Proiektuak, garatu ahala, zenbait ekitaldi akademiko eta aurrez aurreko antolatuko ditu, tokiko kirol politika inklusiboak sustatzeko hitzaldiak eta topaketak barne, bereziki baztertutako taldeak integratzera bideratutakoak. Eurocities sareak Europako 200 hiri baino gehiago biltzen ditu, eta funtsezko atala izango da emaitzak zabaltzeko eta parte hartzen duten hirien artean sinergiak sortzeko.
Honako hauek dira AllStars proiektuan parte hartu duten erakundeak:
- Deutsche Sporthochschule Köln (Alemania), proiektuaren koordinatzailea.
- Vereniging Sport en Gemeenten (Herbehereak).
- Fundacja Institute for Sport Governance (Polonia).
- Stichting Mulier Instituut (Herbehereak).
- European Non-Governmental Sports Organisation (Suedia).
- Euskal Herriko Unibertsitatea (Espainia).
- Høgskolen i Moldea (Norvegia).
- Gipuzkoako Foru Aldundia (Espainia, elkartua).
Diziplina anitzeko talde horrek ikertzaileak, kirol kudeatzaileak eta erakunde publikoak biltzen ditu, eta tokiko kirol politiken esparruan irtenbide berritzaileak eskaintzeko lan egiten du, pertsona guztiek kirola egiteko aukera berdinak izan ditzaten.