Kirol departamentuak jakinarazi du eskola kiroleko zenbait jarduera bertan behera geratu direla, alerta meteorologikoagatik
Osteguna, 2026.eko Urtarrilak 8
Gipuzkoako Foru Aldundiako Kirol Departamentuak jakinarazten duenez, eguraldiaren iragarpena kontuan hartuta eta eskola-kiroleko larrialdi-protokoloari jarraituz, prebentzio-neurriak hartu dira ostiral honetarako, urtarrilaren 9rako, programatuta zeuden eskola-kiroleko jardueren inguruan.
Itsaso-kostaldeko arriskuagatik alerta laranja aktibatuta dagoenez, 09:00etatik 24:00ak arte bertan behera geratuko dira eskola-kiroleko jarduerak honako espazio hauetan:
- Uretan egiten diren jarduerak.
- Kostaldeko eremu irekietan garatzen diren jarduerak.
- Hondartzaren lehen lerroan, lehorrean egiten diren jarduerak.
- Arrisku horren eraginpean egon daitezkeen beste gune batzuk, hala nola ibai-ahoak, ibai-azpialdeak, dartsenak eta portu-kanalak.
Bestalde, haizea eta elurra direla eta abisu horia indarrean dagoenez, 06:00etatik 24:00ak arte jardueren balizko etetea aurreikusten da honako kasu hauetan:
- Estali gabeko instalazioetan burutzen diren jarduerak.
- Mendian garatzen diren jarduerak.
Kasu horietan, jardueren ardura duten eragileek izango dute jarduera eteteko aukera, ingurunearen ezaugarriak, orografia, eror daitezkeen elementuak (zuhaitzak, kartelak…) edo bestelako arriskuak kontuan hartuta.
Kirol Departamentuak arreta berezia jartzeko eskatzen du joan-etorrietan eta jarduerekin lotutako logistika-eginkizunetan, eguraldi-baldintzek sor ditzaketen gorabeheren aurrean zuhurtzia areagotuz.
Era berean, eskola-kiroleko eragile guztiei eskatzen zaie Euskalmeten webgunean argitaratutako alerta meteorologikoen egoeraren jarraipen sistematikoa egitea, programatutako jardueren segurtasuna eta garapen egokia bermatzeko.
Azkenik, Kirol Departamentutik gogorarazten da sor daitezkeen egoeren aurrean zentzuz eta arduraz jokatzeko beharra dagoela, betiere haurren eta gazteen segurtasuna lehenetsiz.