Goizane Álvarez Kirol diputatuak bere borondatez eskatu du Gipuzkoako Batzar Nagusietan agertzea, Multikirola programaren egoeraren berri emateko
Osteguna, 2025.eko Urriak 9
Gipuzkoako Kirol diputatuak, Goizane Álvarezek, bere borondatez eskatu du Gipuzkoako Batzar Nagusietan agertzea, Multikirola programaren izen-emate datuen berri emateko eta egungo egoeraren analisi xehea aurkezteko.
Diputatuak azaldu duenez, data zehaztu gabe dago oraindik, baina urriaren erdialderako espero da lurralde osoko datuak jasota egotea, nahiz eta lehenengo analisiak jada erakusten duten izen-emateen beherakada nabarmena. “Multikirola une erabakigarrian dago, 35 urteko arrakasta frogatuaren ondoren. Guraso batzuek aurkeztutako salaketaren ondorioz epai judizial bat eman da, eta horrek zalantzan jar dezake gure eredua, kirolaren eta gizartearen garapenean eredu izan dena”, adierazi du Álvarezek.
Bere hitzetan, “galdera ez da ea eredua mantentzea gure esku dagoen, baizik eta ea galdu ahal dugun. 35 urteko emaitzek erakusten dute ez gaudela kirol programa huts baten aurrean, gure gizartearen etorkizunerako inbertsio estrategiko baten aurrean baizik”.
Gipuzkoako Foru Aldundiko Kirol Zerbitzua egoera berri honetara egokitzeko lanean ari da, sortu daitezkeen arrakalak zuzentzeko eta, batez ere, epe laburrean haur eta nerabe guztiek euren kirola praktikatzeko aukera izan dezaten bermatzeko.
“Datuak arretaz aztertzen ari gara eta eragile guztiekin elkarlanean ari gara irtenbide onena aurkitzeko. Multikirolak izan du eta izan behar du parte-hartzea, kirol aniztasuna eta balioak sustatzen dituen eredua, Gipuzkoa kirol oinarriko lurralde eredugarri bihurtu dutenak”, amaitu du Álvarezek.