.JPG&deporte=todos)
Kirola eta gizartea Kirol kudeaketa
Kirola-komunikazioa eta komunikazioa-kirola eragileak
Kirolaren, babesleen eta komunikabideen arteko menpekotasuna elkarrekikoa da, elkarren beharra baitute. Kirolak komunikabideetan duen eragina, beren programazioan eta ekonomian adierazteaz gain, beste hainbat alderditan ere adierazten da.
Gaur egungo komunikazioko teknologien (sateliteak, bideoak eta kamara bereziak erabiltzea) ezarpen prozesuetako protagonista nagusienetako bat da kirola. Hainbat telebista kate sendotu izana zein lortutako ospea, maila handi batean, kirol ekitaldi handitan egindako ahalegin handiari zor diote. Kirola berri iturri agortezina da.
Hala ere, ez da soilik kiroletik komunikabideetarako eraginik izaten, kontrako norabidekoan ere baita eraginik. Hirurogeita hamargarren hamarkadara arte, kirolak komunikabideekiko nolabaiteko autonomia izan zuen. Baina, kirol emankizunak hedatzean, komunikabideen eragina handitu egin zen eta jardueraren partaide ere bihurtu ziren. Stadiumak telebista plato bihurtu zirenean, aldaketak erabatekoak izan ziren, eta kirola ikus-entzunezko baldintza berrietara egokitu behar izan zen.
Funtsean, herritarren eta kirolaren arteko harremanen alderdi kultural sakonenetan du eragina egoera berri honek. Horrela, adibidez, ikusten da triunfalismoa gora doala garaipenaren aurrean, eta dramatismoa porrotaren aurrean. Ikuskizuna, bestalde, nazioartera zabaltzen ari dela ikus daiteke.
Komunikabideen multzoa, jendetzentzako kirol ikuskizunaren errealitate berri hori eraikitzeko eratzen da. Prozesu horrek guztiak telebista du funtsezko eta oinarrizko egile.
Telebista irudien ikusgarritasunak eragiten du orain kirolen ospea; ez hainbeste, kirol ikuskizunak berak.
Bestalde kirolen araudian eta arbitroen epaian hasi da eragiten telebista, eta, lehiaketen iraupenari berari buruzko bere irizpideak ezartzen hasi da. Teknologia berrien ezarpenak, hots, kirola ikusteko era berrien ezarpenak, kirolaren ikusgarritasuna handitzen du, zalantzarik gabe.